Ikan Blek; Humor Larantuka

Dua Ekor Paus berhasil di tangkap Nelayan Lamalera; pict 26 Agustus 2011 7:34 am [ ini bukan Marvel mo Sharon]

Marvel mo emanya Sharon. Doran ni jenis ikan Paus yang biasa migrasi dari utara pi selatan. Doran selalu liwa di deka Lamalera. Pas di Laut Sawu, no Marvel yang biasa tunjo jago di depan rombongan, berenang bale muka pucat. Emanya, Sharon po peranja memeke lia ananya. Tako kalo ada Ikan Hiu pemogang kejar mo makan Marvel.

"Ada apa no? Sapa kejar engko? Sebo nama! Kita mo lia dia pun temerah te ampe di ena! Dia ka kita!"
"Ada ikan besa atu, ema. Dia te lebe pemogang dari toran. Besa ngeri. Warnanya itam semua. Kita so tego dia, me te menyao-menyao. Dia berenang tero. Balas tego po ne. Cuek ngeri mati pun. Kita kejar dia me tetap dia tedian. Dia pu ekor tu teputa ruta. Kitapo mendeka mati kena ekor tu. Tajam ngeri ema". Mesin gemeta no Marvel lapor emanya.

"Jadi engko yang so sopan macam jo kata Santa Maria te, bukan balas tego me dia mau mendeka bunoh engko???? Leka anta ema! Ema mo lia, dia pun eko te lebe tajam dari ema pu gigi kah terada!"

Ana mo ema te itu jo langsung befu. Peluru doran dua ungke itu ke sana. Pas doran so deka, ema Sharon rem kaget. Ekonya ampe terangka lurus ke data. Marvel po terpaksa bua yang sama.

"Ema...? Gena maka ema berenti, jo muka tu tepute-rute macam abi lia Alma Kerenti? Ema tako ka?"
"Kalo yang macam begini ni, te ada yang lebeh temerah dari doran. Dulu tu ema pernah gori, me ema pu gigi yang patah. Tobat. Ema tobat so tobat tujuh turunan, tujuh tanjakan, mo tujuh belokan."
"Doran ni ikan apa maka ema?"
"Engko mesti tau. Janga coba-coba no. Te boleh temedun mo doran. Lebe bae loss jo. Doran ni jenis IKAN BLEK", ema Sharon nasehat ananya, sementara dia tunjo ikan itu yang sebenarnya KAPAL SELAM.
Hahahahahahaha...***Frank Lamanepa