Kita Simpa Dalam Ati Jo: Humor Larantuka

Ikan Tuna Ekor Kuning

Lima pulu sembilan menit yang so liwa, kitapun eja atu, tuli status: "BIAR KITA SIMPAN DALAM HATI JO". Kita penasaran ngeri. Dia ni te perna tuli yang sedike tesangko mo perasaan. Lébe banya yang tekike mo Ayat-Ayat Suci jo.

Iseng, kita po tanya dia: "Ai noka le? Tega apa maka no dulu te maso paje jo? Daripada harhari jo tuli yang begitu tu? Pasti baru abi menyelań kisah Bunda Maria lia Ananya piko Salib tu?
Sepulo menit o liwa. Me te ada gejala dia “sedang menulis...”. Pas 15 menit [kita lia jam soalnya hehehe], kita po Ping dia. Liwa 9 detik baru ada gejala "sedang menulis...”. Biasanya te begini.

"Bukan. Kita terada baca Alkitab. Ne. Pas pegari besa te, ada tetangga peloso. Dia ba mo Ikan Ekor Kuning gedu. Kita terepa dia, jo ton dua po kewesa".

"Bapa raja, bisa ne bantu kita dike?", ikan gedu te mesiń data berasu.
"Bisaka oran tua. Me bantu apa dulu ni?"
"Gini raja. Kitapun nyenyora kece di ruma tu, so lelamba ni ancam kita. Torań semua ho te bisa bujo legi".
"Oh..te? Itu tu biasa ka orang tua. Namanya bebuda tu biasa merajo".
"Ne lé... Ini ni ho laen na laen lé... Gini jo, raja iko kita pi rumah jo he...?"

"Itu tu po bae. Kita mau. Me, orang tua musti cerita dulu ka. Biar kita po tau sebelon ke dara.."
"Bae kalo gitu. Raja tau to kalo kita ni cuma mencari lao ae masin. Tiap hari kita mencari cuma unto dia biar dia po bisa sekola tinggi lebe dari bapanya.
”So beto ka tu….”

“Me justru karna itu te? Dia te mau bapanya sendiri setengah mati. Dia mo iko kita. Mo bantu mencari. Dia betau ibu guru so pesan dorań supaya jadi ana yang bae tu, musti bantu oran tua. Kita so omo dia. Oa ni mesiń kece jadi bantu ema di rumah jo. Me te mau. Dia betau bapanya yang lebe perlu dibantu. Ema cuma dirumah cuci piring-mangko, pekean, mo masa jo tu le..?”
“Noka tu oran tua. Susa cari ana yang mode begitu sekerań ni. Ho ampa!”.

“Beto te ka. Me dia mesiń kece. Jo bapanya taro bua apa, raja? Kita mesiń gress na gress ni le….? Mesiń lengkap ka…?"
“Masalah te cuma itu jo, oran tua?”
“Te tau sapa yang aja beraja. Dia po paksa kita, tiap kali kita mengae bale, dapa atu ka dua, musti bage mo orań. Dia bediri ceka pingga jo tunjo kita, ‘Bapa denga e, bebage tu lebe bae dari tada tanga. Dapa berkah umo panja. Kita te mau bapa mati cepa!’. Kita mo emanya so te tau legi mo bua apa.”
“Oran tua, kalo gitu betau gurunya jo. Biar gurunya datań omo dia…”
“Ai.. itu ka yang jadi masalah pegari ni. Rak Pirin, kursi memeja semua so tehobe. Tega torań betau mo pangge gurunya te? Dara tu ho pegań ma piso.”

“Heńńńńńń…. Puka rera! Ho ampe begitu tu!?!?!?!”

“Denari te kita mencari. Angi aro matipun, jadi cuma dapa atu ni jo. Eko Kuning ni. Kita betau emanya, ikan di lemari kemarin po mesiń banya, jadi ini ni toran jua jo. Pas po minya tana mo bera di blek so mendeka abi. Me engko, tekejo ana te peloso. Dia paksa ikan te musti beri orań. Te bole jua. Toń dua so bujo dia mati puń. Me ledoń.”

“Ampo ma… Iko sapa dia tu…”
“Itu jo dia ambe piso jo ancam te. ‘Kita bantu iko bapa mencari, po te bole. Biar dapa lebe banya. Jo bage mo oran po te bole legi. Kalo gitu, macań guru pesan betau ana perempuan tu musti simpa dalam hati macam Bunda Maria, lebe baé ikan tu kita simpa dalam hati jo’. Itu jo raja, dia ambé piso té mo bela diapuń dada jo mo simpa ikan té ka? Ai kita mo emanya gemeta mendeka mati bediri. Kaki ni so kata macam jo orań pasa dagiń babi tu ka. Mo télépa jo…”

“Setan suwanggi ho maso hé tu?”
“Jo kita datan ba mo ikan ni supaya toń dua ke dara jo kita kasi ikan ni di dia pu muka. Kalo terada dadanya terobe mobe. Leka dań raja.”
“Gitu té, bétau ka tétédi?”
“%&?!#$*&..?”
Hahahahahahaha ***Frank Lamanepa